الرئيسية
أتمنى , نسخه , الصبح , الكسل , اعلن , تاتي
اتمنى عدنه شعب
مايقبل بموته!
وأتمنى عدنه كمر
ماتاكله الحوته!
أتمنى أصحه الصبح ... الكَه اعله بابي ورد
أومن أمر سيطره
تارس جيوبي برد!
وماريد ساعد قوي.. ولا ريد جرحك نسر
ممنوع يبجي طفل .. كَلب الوطن ينكسر
ممنوع زينب بعد .. توكَف بحضرة شمر
كافي دمار وقتل.. موخلص حتى السدر
إنريد نبني وطن..
نحتاج نبني فكر.. يستوعب المطرقة
بعدين نبني جسر
****
يذبحني منظر طفل ... إمزكه اثيابه
إخيالته من كصب
ويصيح نحن (العرب)
وسلاحه نشابه
لو راد يلعب..(عرك)!
يرسم سواتر وهم
ويترس الكَاع بجثث .. للخاسرين الحرب
بس همه نفس الجثث .. بالواقع أصحابه
***
يعجبني منظر طفل ... مرتبه اثيابه
من كثر حب الوطن
حط روحه بكتابه
إتكول جنه نبي ... وساجد بمحرابه
إشكد عنده طيبة نفس ... ويلاه.. يايابه
من زغره أبوه منتبه
متعجب بآدابه
من يشتكي من العطش..
ما يشرب ويكتفي!
يشرب اللعابه!
يمشي وي أبوه للحقل
يشتل مروءة ومثل
ويترس شليله فرح .. ويوزع أحبابه
ويرسم طيور ..ومطر..
ويغسّل من المطر
ويرسمله كوخ ونهر .. ويمدد بـ(بابه)
يطلب هديته ورد
لو نجح بالمدرسه
ما يطلب من الأهل
جيبولي دبابه!!
